نبی صلی اللہ علیہ وسلم نور یا بشر

سوال

کیا نبی صلی اللہ علیہ وسلم نور تھے، برائے مہربانی حوالوں کی روشنی میں رہنمائی فرمائیے؟

جواب

نبی صلی اللہ علیہ وسلم کے بارے میں قرآن مجید بالکل واضح ہے کہ آپ بشر تھے۔ نبی صلی اللہ علیہ وسلم کے مخالفین نے جب جب آپ کے بشر ہونے کی بنا پر آپ کی رسالت کا انکار کیا یا آپ کے بشر ہونے کو ہدف طعن بنایا تو قرآن مجید میں کسی بھی موقع پر یہ نہیں کہا گیا کہ آپ تو سراپا نور ہیں، تم انھیں بشر کیوں قرار دے رہے ہو، بلکہ اس کے جواب میں آپ کی زبان سے کہلوایا گیا کہ آپ بشر ہیں۔ مثلاً سورۂ کہف (18: 110) میں ہے:

 ‘قُلْ اِنَّمَآ اَنَا بَشَرٌ مِّثْلُکُمْ يُوْحٰۤی اِلَيَّ’

(کہہ دو :میں تمھاری ہی طرح ایک بشر ہوں، میری طرف وحی کی جاتی ہے)۔

اب سوال یہ ہے کہ یہ تصور کہاں سے پیدا ہوا ہے؟ غالب امکان یہ ہے کہ یہ تصور وحدت الوجود کے ماننے والوں کے ہاں سے عوام میں پھیلا ہے۔ جس طرح وحدت الوجود کا تصور قرآن مجید کے تصور توحید کے بالکل منافی ہے، اسی طرح اس کے زیر اثر بننے والے اس طرح کے خیالات بھی بے بنیاد ہیں۔

مجیب: Talib Mohsin

اشاعت اول: 2015-07-29