کیا ماں باپ خدا سے افضل ہوتے ہیں؟

سوال

میرا سوال یہ ہے کہ کیا ماں باپ خدا سے افضل ہوتے ہیں؟ اسلام کہتا ہے کہ اگر ماں باپ کہیں تو آپ اپنے بیوی بچوں تک کو چھوڑ دو۔ تو کیا نتائج کی پرواہ کیے بغیر ہی والدین کی ہر بات مان لی جائے؟ بعض اوقات والدین کا ہر بات ماننے پر انسان کو نقصان اٹھانا پڑتا ہے تو کیا یہ ضروری ہے کہ انسان اپنے نفع نقصان کو نظر انداز کر کے اپنے والدین کی فرمانبرداری کو ترجیح دے؟

جواب

آپ نے پوچھا ہے کہ والدین کی فرماں برداری کی حدود کیا ہیں۔

قرآن مجید میں والدین کے حوالے سے جو حکم دیا گیا ہے ،وہ حسن سلوک کا ہے۔ حسن سلوک کا مطلب یہ ہے کہ والدین کو کوئی ایسی بات نہ کہی جائے جس سے ان کو تکلیف یا اذیت پہنچے۔ احادیث میں فرمانبرداری حسن سلوک ہی کے ایک تقاضے کو بیان کرتی ہے۔ اس میں کوئی شبہ نہیں کہ نافرمانی حسن سلوک کے تقاضے کے خلاف ہے۔ لیکن قرآن مجید کے لفظ حسن سلوک سے یہ بات واضح ہو جاتی ہے کہ اطاعت کی حد کیا ہے۔ صرف وہ نافرمانی ممنوع ہے جو والدین کے ساتھ محبت ، ان کے احترام یا ان کی خدمت کی نفی کرتی ہو۔یہ بات پیش نظر رہنی چاہیے کہ جب کوئی شخص دین، اخلاق یا تدبیر کے پہلو سے والدین کا کہنا نہ مان سکتا ہو تو اسے ایسا کوئی اسلوب اختیار نہیں کرنا چاہیے جو حسن سلوک کے منافی ہو۔

مجیب: Talib Mohsin

اشاعت اول: 2015-07-23